चेन्नई | 17 नोव्हेंबर 2026
भारतीय क्रिकेटचा माजी कर्णधार आणि चेन्नई सुपर किंग्सचा (CSK) लाडका खेळाडू महेंद्रसिंह धोनी आता नव्या भूमिकेत दिसणार आहे. IPL 2027 पासून धोनी चेन्नई सुपर किंग्स संघाचा मेंटॉर (मार्गदर्शक) म्हणून काम पाहणार आहे. चेन्नई सुपर किंग्सने याबाबत अधिकृत घोषणा केली आहे.
जवळपास दोन दशकांपासून धोनी आणि चेन्नई सुपर किंग्स यांचे अतूट नाते आहे. या काळात धोनीने आपल्या नेतृत्वाखाली संघाला अनेक यश मिळवून दिले. आता मैदानावर खेळाडू म्हणून दिसण्याऐवजी तो संघातील नव्या खेळाडूंना मार्गदर्शन करताना दिसणार आहे.
‘धोनीशिवाय CSK ची कल्पनाच करू शकत नाही’ – एन. श्रीनिवासन
चेन्नई सुपर किंग्सचे मालक एन. श्रीनिवासन यांनी धोनीच्या योगदानाचे कौतुक केले. ते म्हणाले, “MS Dhoni शिवाय CSK नाही. जवळपास दोन दशकांपासून आम्ही एकत्र प्रवास केला आहे. या प्रवासात अनेक विजय, पराभव आणि चढ-उतार आले. मात्र आमच्यातील विश्वास कधीही कमी झाला नाही.”
2008 मध्ये धोनीला चेन्नई संघात घेण्याचा निर्णय आपण घेतला होता आणि तो आपल्या आयुष्यातील सर्वोत्तम निर्णय ठरल्याचेही श्रीनिवासन यांनी सांगितले. धोनी केवळ एक महान क्रिकेटपटू नाही, तर एक उत्तम माणूस आहे. चेन्नई सुपर किंग्सची ओळख नेहमीच धोनीशी जोडलेली राहील, असेही त्यांनी स्पष्ट केले.
नव्या खेळाडूंना धोनीच्या अनुभवाचा फायदा होणार
चेन्नई सुपर किंग्सच्या मालक रूपा गुरुनाथ यांनीही धोनीच्या योगदानाचे कौतुक केले. धोनीसारखा खेळाडू आयुष्यात एकदाच घडतो. सुरुवातीपासूनच तो CSK सोबत आहे आणि त्याने या संघाचा मजबूत पाया तयार केला आहे, असे त्या म्हणाल्या.
धोनीने मैदानावर आणि मैदानाबाहेरही संघासाठी मोठे योगदान दिले आहे. त्याचे नेतृत्व, साधेपणा, मेहनत आणि चाहत्यांशी असलेले नाते कायम लक्षात राहील. आगामी काळात संघात अनेक युवा खेळाडू असणार आहेत. अशा वेळी धोनीचा अनुभव आणि मार्गदर्शन नव्या खेळाडूंना घडवण्यासाठी महत्त्वाचे ठरेल, असे रूपा गुरुनाथ यांनी सांगितले.
धोनीचा चेन्नईशी असलेला संबंध कायम राहणार
CSK चे व्यवस्थापकीय संचालक के. एस. विश्वनाथन यांनी सांगितले की, धोनीने क्रिकेटमध्ये मिळवलेले यश प्रत्येक चाहत्याच्या आठवणीत राहील. मात्र धोनीचे सर्वात मोठे वैशिष्ट्य म्हणजे त्याने चेन्नई शहराला आपले मानले आणि चेन्नईकरांनीही त्याला आपलेसे केले.
धोनीच्या नेतृत्वाखाली संघाने जिंकलेली विजेतेपदे महत्त्वाची आहेतच; पण ती ज्या पद्धतीने जिंकली, तेही त्याच्या नेतृत्वाचे मोठे वैशिष्ट्य आहे. मैदानावर पिवळ्या जर्सीत धोनी दिसणार नसला, तरी त्याचे मार्गदर्शन संघाला पुढील अनेक वर्षे मिळत राहणार आहे, असे त्यांनी सांगितले.
धोनीच्या नावावर अनेक विक्रम
महेंद्रसिंह धोनीने चेन्नई सुपर किंग्सला आपल्या नेतृत्वाखाली तब्बल 5 वेळा IPL विजेतेपद मिळवून दिले आहे. IPL इतिहासात सर्वाधिक विजेतेपदे मिळवणाऱ्या कर्णधारांमध्ये त्याचा समावेश होतो. याशिवाय त्याने CSK ला दोन वेळा चॅम्पियन्स लीग T20 चे विजेतेपदही मिळवून दिले आहे.
धोनीच्या नावावर चेन्नई सुपर किंग्सकडून 5,314 धावा असून तो संघासाठी दुसऱ्या क्रमांकाचा सर्वाधिक धावा करणारा फलंदाज आहे. तसेच CSK कडून 272 सामने खेळण्याचा विक्रमही त्याच्या नावावर आहे.
शेवटच्या चेंडूवर सामना जिंकून देण्याची क्षमता, हेलिकॉप्टर शॉट, शांत स्वभाव आणि कठीण परिस्थितीत घेतलेले अनपेक्षित निर्णय यामुळे धोनीने क्रिकेट चाहत्यांच्या मनात वेगळे स्थान निर्माण केले आहे.
CSK च्या नव्या पर्वात धोनीची महत्त्वाची भूमिका
धोनीची मेंटॉर म्हणून नियुक्ती ही चेन्नई सुपर किंग्ससाठी नव्या पर्वाची सुरुवात मानली जात आहे. त्याच्या अनुभवाचा फायदा संघातील युवा खेळाडूंना होणार असून भविष्यातील मजबूत संघ तयार करण्यासाठी त्याची भूमिका महत्त्वाची ठरणार आहे.
खेळाडू म्हणून धोनीने चेन्नईला अनेक ऐतिहासिक विजय मिळवून दिले. आता मार्गदर्शक म्हणून तो संघाला किती पुढे घेऊन जातो, याकडे IPL चाहत्यांचे लक्ष लागले आहे.
चेन्नईच्या पिवळ्या जर्सीशी धोनीचे नाते कायम राहणार असून, आता मैदानाबाहेरून तो CSK च्या नव्या पिढीला घडवणार आहे.








Leave a Reply